ÞAÐ ER KOMIÐ SUMAR !!!

Velheppnuð vortónleikaröð er að baki og með henni lauk viðburðaríku starfsári Karlakórs Reykjavíkur. Kórinn kom fram á 14 tónleikum sem haldnir voru í Ráðhúsi Reykjavíkur, Hallgrímskirkju í Reykjavík, Glerárkirkju á Akureyri, Miðgarði í Skagafirði og í Langholtskirkju í Reykjavík. Karlakór Reykjavíkur vill þakka þeim rúmlega 5000 áhorfendum sem sóttu þessa tónleika fyrir komuna og vinsamlegar viðtökur.

Ýmsir viðburðir ársins munu lifa lengi í minni kórmanna og er á engan hallað þegar minnst er sérstaklega á samstarf við Karlakórinn Heimi í Skagafirði og sameiginlega tónleika með þeim ágæta kór sem fóru fram norðan heiða og í Reykjavík í mars mánuði. Þetta samstarf kóranna var afar ánægjulegt í alla staði og náðu félagar beggja kóra vel saman í söng og gleði.

Starf Karlakórs Reykjavíkur liggur niðri að mestu leyti yfir sumartímann. Þó er reglulega hóað í hann til að koma fram við ýmis tækifæri, eins og getið er um í frétt hér að neðan. Félagar gera þó sitt til að rækta félagsskapinn utan hefðbundins starfsárs. Þar ber hæst árleg útilega sem kvenfélag kórsins stendur fyrir fyrstu helgina í júlí.

Strax er farið að huga að næsta starfsári kórsins. Þann 3. Janúar 2011 eru liðin 85 ár frá stofnun hans. Þeirra tímamóta verður minnst með margvíslegum hætti í starfi kórsins og verður getið um það hér á heimasíðunni þegar nær dregur.

Karlakór Reykjavíkur sendir styrktarfélögum sínum og velunnurum öllum hlýjar sumarkveðjur og hlakkar til samverustunda á næsta starfsári.

SÖNGUR VIÐ ÖLL TÆKIFÆRI

Karlakór Reykjavíkur kemur fram við ýmis tækifæri, ýmist fullskipaður eða í smærri einingum. Þessi tækifæri geta verið árshátíðir fyrirtækja, brúkaup, afmælisveislur eða móttökur að öðru tilefni. Þá hefur það færst í vöxt að leita til kórsins með söng í jarðarförum. Þú getur sent tölvupóst á kor@kkor.is eða hringt í 551-4885 til að afla nánari upplýsinga um þetta.

GERÐHAMRAR – GLÆSILEGUR VEISLUSALUR TIL LEIGU

Gerðhamrar, félagsheimili Karlakórs Reykjavíkur var opnað formlega í upphafi árs 2008. Það er staðsett á efstu hæð hússins nr. 13 við Grensásveg (Pfaff húsið). Í félagsheimilinu er glæsilegur salur sem hentar vel til funda– og veisluhalda. Vinsamlegast sendið tölvupóst á kor@kkor.is eða hringið í síma 551-4885 ef frekari upplýsinga er óskað um salarleigu.